في الوقت اللي ولات فيه التكنولوجيا جزء كبير من حياتنا، صارت حماية معلوماتنا على الانترنت حاجة ضرورية، وخاصةً على فايسبوك، خاطر برشا قرصان (هاكرز) يحاولوا يسرقوا حسابات الناس لأسباب مختلفة: النصب، التهديد، أو حتى التجسس.

هاو شوية نصائح باش تحمي روحك:

1. كلمة السر؟ خليهـا قوية برشة!

ما تستعملش كلمة سر سهلة كيما “123456” ولا “azerty”. خليها مزيج بين حروف كابيتال وصغار، أرقام ورموز. مثال: Sbeh@2025!.
وزيد بدّلها كل مدة.

2. فعّل التحقق بخطوتين (Two-Factor Authentication)

هاذي خدمة يقدّمها فايسبوك وين كل ما تحب تدخل من جهاز جديد، يبعثولك كود في SMS ولا في تطبيق (كيف Google Authenticator).
هكاكا حتى كان الهاكر عرف كلمة السر، ما ينجمش يدخل لحسابك.

3. رد بالك من الروابط المشبوهة

برشا مرات يبعثولك روابط على الماسنجر أو في تعليق، تقولك “شوف صورتك هنا” ولا “شوف الفيديو هذا”.
ما تكبسش على أي رابط مش واضح، ينجم يكون فخ باش يسرقولك الحساب.

4. ما تعطيش كلمة السر لحتى حد

حتى كان جاك حد قالك أنا من إدارة فايسبوك، صدّقني، ما يطلبوهاش.
فايسبوك ما يطلبش معلومات شخصية في الماسنجر.

5. راجع التطبيقات المرتبطة بحسابك

ادخل لإعدادات الفايسبوك، وشوف شكون عندو صلاحيات على حسابك (مثلاً ألعاب قديمة ولا مواقع دخلتلها بالفيسبوك).
حذف اللي ما عادش تستعملوهم.

6. سجّل الخروج من الأجهزة اللي ما تعرفهمش

من الإعدادات تنجم تشوف وين حسابك مفتوح. كان تلقى بلاصة ما تعرفهاش، اعمل “تسجيل خروج” بسرعة وبدّل كلمة السر.

الخلاصة

أمانك يبدأ منك. ما تعطيش الثقة لحتى حد، وكون ديما واعي وين تدخل، شنوة تكبس، وشنوة تنشُر. وكل مرة فدّيت، راجع الإعدادات متاعك وتأكد إلي كل شيء OK.

وما تنساش، الوقاية خير من العلاج. 😉